२९ जेठ, काठमाडौं – दोश्रो चरणको चुनाव र उम्मेदवारबारे छलफल गर्न कांग्रेस र एमालेले सोमबार पनि आन्तरिक छलफल गर्दैछन् ।
प्रदेश नम्बर २ का महानगरपालिका र उपमहानगरपालिकामा पार्टीका उम्मेदवार चयनका साथै चुनावी रणनीति बनाउन कांग्रेसको केन्द्रीय कार्यसम्पादन समितिको बैठक बस्दैछ ।
बैठकमा राजपाले चुनावमा भाग नलिने बताइसकेको अवस्थामा अबको राजनीतिक अवस्था र चुनावी रणनीतिबारे पनि छलफल हुने नेताहरुले बताएका छन् ।यस्तै नेकपा एमाले स्थायी कमिटीको बैठक पनि बस्दैछ । दोश्रो चरणको चुनावको विषय नै बैठकको मुख्य एजेण्डा रहने एमाले प्रचार विभाग प्रमुख योगेश भट्टराईले जानकारी दिए।
बैठकमा राजपाले चुनावमा भाग नलिने बताएपछिको अवस्था, प्रदेश नम्बर २ का महानगरपालिका उपमहानगरपालिकामा उम्मेद्वार चयन, दोश्रो चरणको चुनावमा नेता कार्यकर्ताको परिचालन, विभिन्न दलबाट एमाले प्रवेश गरेका नेतालाई जिम्मेवारी दिने लगायत विषयमा पनि छलफल हुने उनले बताए । बैठक दिउँसो ३ बजेपछि एमाले केन्द्रीय कार्यालय धुम्बाराहीमा बस्नेछ ।