सहिद बुवाको सपना पूरा गर्न छोरीले उम्मेदवारी दिइन

१८ जेठ, पाल्पा – प्रजातन्त्र स्थापनाका लागि जनआन्दोलनमा होमिदा सेनाको गोली लागेर २०४६ साल फागुन १६ गते सूर्यप्रसाद घिमिरेको मृत्युवरण भयो ।

देश र जनताका लागि लड्दै गर्दा अल्पायुमै सहिद बनेका घिमिरेको सपना पूरा गर्न उनकै छोरी विष्णुदेवी घिमिरे आचार्यले नेपाली काँग्रेसको तर्फबाट नगरपालिकाको उपप्रमुख पदमा उम्मेदवारी दिएको हो ।

सहिदको सपना पूरा गर्ने अठोटका साथ निर्वाचनमा होमिएकी उनको उम्मेदवारी पार्टीले सार्वजनिक गरेपछि स्थानीय तहको निर्वाचनलाई आमनगरवासीले चासोका रुपमा लिन थालेका छन् ।

आफ्ना बाबुको देश र जनताप्रतिको बलिदानलाई पुनः ब्यूँताउन र इतिहासको पाना कोर्ने सङ्कल्पका साथ आफूले उम्मेदवारी दिएको उनले बताए ।
उपप्रमुख पदको उम्मेदवारका रुपमा निर्वाचनको माहोलमा निस्किएकी घिमिरेले रामपुर नगरपालिकामा सहिद सूर्यप्रसाद घिमिरेको सालिक र वृद्धाश्रम स्थापना, अपाङ्गका लागि आश्रमस्थल स्थापना गर्ने योजनालाई पहिलो प्राथमिकता राखेको छ ।