भरतपुरको मतगणनास्थलमा तनाव, माओवादीले मतपत्र च्यातेपछि

१५ जेठ, चितवन – माओवादी प्रतिनिधिले मध्यरातमा मतपत्र च्यातिदिएपछि भरतपुर महानगरपालिकाको मतगणनास्थलमा तनाव सिर्जना भएको छ र अहिले मतगणना रोकिएको छ ।वडा नम्बर १९ को मतगणना भइरहेका बेला माओवादी प्रतिनिधीले मतपत्र च्यातेपछि मतगणना रोकिएको हो । वडा नम्बर २१ को मतगणना सकिएपछि १९ र २० को गरेर ६ हजार १ सय ६२ मत गन्न बाँकी थियो । त्यसबेला एमालेका मेयरका उम्मेदवार देवी ज्ञवाली माओवादी केन्द्र र कांग्रेस गठबन्धनकी रेणु दाहाल भन्दा ७ सय ८४ मतले अघि थिए।

त्यसपछि वडा नम्बर १९ को मत गन्न सुरु गरिएको थियो । वडा नम्बर १९ को २८ सय ६० मत खसेकोमा १८ सय ९ मत गनेर मतपरिणाम अपडेट गर्दा ज्ञवालीको ४१ हजार ६ सय ४१ र दाहालको ४० हजार ९ सय ८ मत आएको थियो । यसबेलासम्म ज्ञवालीको अग्रता ७ सय ३३ देखियो । माओवादीले वडा नम्बर १९ मा ज्ञवालीसँगको मत अन्तर अझै कम हुने अपेक्षा गरेकामा त्यो नभएपछि मतगणनामा अवरोध गरेको एमालेका नेताले आरोप लगाएका छन् । मतपरिणाम अपडेटपछि फेरि गन्न सुरु गरेलगतै माओवादीका प्रतिनिधिले मतपत्र च्यातेको एमालेका मेयरका उम्मेद्वार ज्ञवालीले आरोप लगाए ।

मतपत्र च्यातेको आरोपमा प्रहरीले माओवादीका प्रतिनिधि मधु न्यौपाने र द्रोण शिवाकोटीलाई पक्राउ गरेको छ । यस्तै मतगणना स्थल बाहिर होहल्ला गरेको आरोपमा एमाले कार्यकर्ता गंगा लामा पक्राउ परेका छन् । स्थिति नियन्त्रणमा लिन प्रहरीले लाठीचार्ज समेत गरेको छ ।