मधेस केन्द्रित प्रमुख तीन दलले स्थानीय तहको चुनावमा साझेदारी गर्नेबारे बहस सुरु

१२ जेठ, काठमाडौं – मधेसकेन्द्रित प्रमुख तीन दलले स्थानीय तहको चुनावमा साझेदारी गर्नेबारे बहस सुरु गरेका छन् ।

आगामी जेठ ३१ मा हुने स्थानीय तहको निर्वाचनमा कसरी सहकार्य गरेर जाने भन्नेबारे राष्ट्रिय जनता पार्टी राजपा, नेपाल लोकतान्त्रिक फोरम र सङ्घीय समाजवादी फोरम नेपालबीच बिहीबार छलफल भएको हो ।

भक्तपुरको सानोठिमीस्थित राजपा नेता महन्थ ठाकुरको निवासमा बेलुकासम्म भएको तीन शीर्ष नेताको छलफलले कुनै निष्कर्ष भने निकालेन । स्थानीय तहको निर्वाचनमा साझेदारी गर्न तयार रहेपनि राजपाको निर्वाचन चिह्न नभएकाले आवश्यक पहल गर्नेबारे कुराकानी भएको थियो । निर्वाचन र सङ्घर्षका कार्यक्रमलाई सँगै अघि बढाउनेबारे पनि नेताहरुबीच बहस चलेको थियो ।