५ जेठ, कास्की – निर्वाचन मत परिणामका कारण मत परिणामप्रति असन्तुष्टी जनाउँदै पोखरा कांग्रेस सभापति बजिरमान श्रेष्ठले राजीनामा दिएका छन । पार्टीभित्र अन्तरघात भएको कारण कांग्रेसका गढ मानिएका वडाबाट पनि अपेक्षित मत नआएको कारण यस्तो मत परिणाम आएको उनको भनाई छ ।
निराशाजनक परिणामप्रति आफु पनि जिम्मेवार रहेको महशुसका साथ राजीनामा गरेको उनले राजीनामा पत्रमा लेखेका छन । पोखरा लेखनाथ महानगरपालिकाको अहिले १२ वटा वडाको मत गनिएको छ । ती मध्ये २,३,४,८,९, १०,११ र १२ काँग्रेसका गढ मानिन्छ । यी सबै वडा पोखरा मुख्य बजार क्षेत्रमा पर्दछन् । तर ती मध्ये धेरै वडामा नेपाली काँग्रसका मेयर पदका उमेद्वारलाई भन्दा एमालेका उमेद्वारलाई बढी मत आएको छ ।
नगरसभापति श्रेष्ठले विज्ञप्तिमा कांग्रेसका इमान्दार र कर्मठ सदस्यको सहयोगका वावाजुद यो मत आएको बताउँदै निराशानजक मत परिणामकालागि अधिकांश केन्द्रीय सदस्य, सांसद, जिल्ला कार्य समिति तथा क्षेत्रीय समितिका सभापतिलगायतलाई संवेदनशील र जिम्वेवार हुन आग्रह गरेका छन ।
यसले सांगठनिक र सामाजिक नैतिकताको आधारमा कांग्रेस बिरुद्धको अन्तर्घात, गैरजिम्मेवारीपन र उदासिनताको जिम्मेवारी लिंदै कांग्रेसलाई पुनर्निर्माण, पुनर्संरचना, पुनर्गठनका लागि मार्ग प्रशस्त गरिदिन अनुरोध पनि गरेका छन ।