बनेपाको प्रमुख/उपप्रमुखमा र काठमाडौं–२ मा एमालेको प्यानल विजयी

५ जेठ, काभ्रे/काठमाण्डौँ – बनेपा नगरपालिकामा प्रमुख र उपप्रमुखमा एमालेका उम्मेदवार विजयी भएका छन्। एमालेका लक्ष्मीनरसिंह बादे ११ हजार ४०९ मत प्राप्त गरी नगरप्रमुख निर्वाचित भएका हुन्। उनका निकटतम प्रतिद्वन्द्वी कांग्रेसका रामराज जोशीले ९ हजार ६ सय ५९ मत प्राप्त गरे। एमालेकी रेखा सापकोटा दाहाल ११ हजार २ मत ल्याई उपप्रमुख विजयी भइन्। उनका निकटतम प्रतिद्वन्द्वी नेपाली कांग्रेसकी निर्मला श्रेष्ठले ९ हजार ९ सय ६० मत प्राप्त गरिन्।

यता काठमाडौं महानगरपालिकाको वडा नं.२ एमालेका उम्मेदवार राजेन्द्रकुमार श्रेष्ठसहितको प्यानल विजयी भएको छ। श्रेष्ठ एक हजार ८४० मत प्राप्त गरी वडाध्यक्ष निर्वाचित भएका हुन्। उनका निकटतम प्रतिद्वन्द्वी कांग्रेसका उम्मेदवार प्रमोदराज शर्माले ६८४ मत पाए। यस्तै, महिला सदस्यमा पूर्णलक्ष्मी रजक, महिला दलित सदस्यमा ईश्वरी परियार, खुला सदस्यमा पदमकाजी महर्जन र विमल गुरुङ विजयी भएका छन्। महानगरपालिकाको वडा नं.२ मा तीन हजार ४५१ मत खसेको थियो।