नापी कार्यालयमा बम बिस्फोट

२९ बैशाख, राजविराज – सप्तरी सदरमुकाम राजविराज–५ स्थित नापी कार्यालयमा  शुक्रबार दिउँसो बम बिस्फोट भएको छ । दिउँसो साढे ४ बजे कार्यालयको कम्पाउण्ड भित्र रहेको ग्यारेजमा बम बिस्फोट भएको हो । बिस्फोटबाट ग्यारेज भित्र रहेको मोटरसाइकल र साइकल क्षति ग्रस्त हुनुका साथै भवनको छानो उडाएको छ । बम बिस्फोटले ग्यारेज भवनको भित्ताहरु समेत चर्किएको छ भने कार्यालय बन्द हुने समय भएका कारण सेवाग्राही नभएकाले मानवीय क्षति भने हुन पाएन । घटनाको खबर पाए लगतै पुगेको प्रहरीको टोलीले कार्यालयलाई सुरक्षा घेरामा लिई आवश्यक अनुसन्धान सुरु गरेको छ ।

बम विस्फोटको जिम्मा तराइमा सशस्त्र आन्दोलनरत अखिल तराई जनतान्त्रिक मुक्ति मोर्चाले लिएको छ । मोर्चा संयोजक जय कृष्ण गोइतले प्रेस विज्ञप्ती जारी गर्दै नापी शाखा कार्यालय भित्र व्याप्त भ्रष्टाचारको विरुद्धमा चेतावनी स्वरुप बिस्फोट गराएको जनाएको छ ।