राष्ट्रपति पाँच दिनका लागि आज श्रीलङ्का जाँदै

२९ बैशाख, काठमाडौं – राष्ट्रपति विद्यादेवी भण्डारी पाँचदिने भ्रमणका लागि आज श्रीलङ्का जाँदै छिन । राष्ट्रपति भण्डारी नेपाल एयरलाईन्सको विमानमार्फत् बिहान पौने ११ बजे थाइल्यान्डको ब्याङ्कक हुँदै श्रीलंका जाने उनका सल्लाहकार सुशिल प्याकुरेलले जानकारी दिए ।

बुद्धजयन्तीका अवसरमा श्रीलङ्काले मनाउने राष्ट्रसंघीय सम्मेलनको समापन समारोहमा राष्ट्रपति भण्डारी प्रमुख अतिथिका रुपमा सहभागी हुनेछिन ।

भ्रमणका क्रममा राष्ट्रपति भण्डारीले श्रीलंकाली समकक्षी मैत्रीपाला सिरिसेना लगायत उच्च राजनीतिक नेतृत्वसँग भेटवार्ता गर्ने कार्यक्रम रहेको छ । भ्रमणका क्रममा राष्ट्रपति भण्डारीले क्यान्डीमा रहेको बुद्धको दाँतको अस्थीधातुको दर्शन र श्रीलङ्काका विभिन्न धार्मिक क्षेत्रको पनि भ्रमण गर्ने भएकीछिन । श्रीलङ्काको राजधानी कोलोम्बोमा आजदेखि सुरु हुने सम्मेलनको समापन बैशाख ३१ गते हुनेछ । राष्ट्रपति भण्डारी आगामी जेठ २ गते स्वदेश फर्कने छिन । राष्ट्रपति भण्डारीले आज थाइल्याण्डमा रहँदा स्वर्गीय थाई राजा भूमिबल अदुल्यादेजको पार्थिव शरीरमा माल्यापर्ण गरी श्रद्धाञ्जलि व्यक्त गर्नेछिन ।