सडक दुर्घटनामा एकको मृत्यु, एक घाइते

१५ बैशाख, काठमाडौं – स्वयम्भू नजिक ठाडो भर्याङमा भएको सडक दुर्घटनामा गएराति काठमाडौँ बस्दै आएकी गोरखाकी ३५ वर्षीया भगवती अर्यालको मृत्यु भएको छ ।

लु १ ख ९९९६ नंको ट्रकले स्वयम्भूबाट सीतापाइला आउने क्रममा बा ८२ प ३२२ नंको स्कुटरलाई ठक्कर दिँदा स्कुटर पछाडि बसेकी अर्यालको घटनास्थलमै मृत्यु भएको महानगरीय ट्राफिक प्रहरी महाशाखाले जनाएको छ ।

दुबै सवारीसाधन चालकको नाम भने खुल्न नसकेको प्रहरीले बताएको छ  । स्कुटी चालकको सहिद मेमोरियल अस्पतालमा उपचार भइरहेको छ । ट्रक चालकलाई प्रहरीले पक्राउ गरेको छ । घटनामा संलग्न दुवै साधन महानगरीय प्रहरी वृत्त स्वयम्भूको नियन्त्रणमा छ ।