१४ बैशाख, दाङ – अझै पनि दुई हजार भन्दा बढी बालबालिका दाङ जिल्लामा विद्यालय भन्दा बाहिर रहेका छन् । जिल्ला शिक्षा कार्यालयले गरेको एक अध्ययनले जिल्लाका २ हजार २ सय ८ जना बालबालिका अहिले विद्यालय भन्दा बाहिर रहेको देखाएको हो ।
ती मध्ये एक हजार ५२ जनाले घरको आर्थिक अवस्थाका कारण विद्यालय छाडेको बताएका छन् । विद्यालय मार्फत गरेको सर्वेक्षणका क्रममा गरिबीका कारण विद्यालय जान नसकेको ती बालबालिकाहरुले बताएको जिल्ला शिक्षा अधिकारी रमेश मैनालीले बताउनुभयो ।
गरिबीका कारण मात्रै विद्यालय नगएका भने होइनन् । विद्यालय टाढा भएर नगएका १ सय ६२ जना, घरमा भाई बहिनीलाई हेर्नुपर्ने भएका कारण नगएका १ सय १२ जना, पढन मन नलागेर नगएका ४ सय ६ जना बालबालिका रहेका छन् । जिल्लामा ५१ जना शारीरिक अपाङ्गता भएकै कारण विद्यालय जानबाट वञ्चित भएका छन् ।