व्यक्तिगत सफलता नभइ टिमको सफलता :रोनाल्डो

१३ चैत,–पोर्चुगलका कप्तान क्रिष्टियानो रोनाल्डोले व्यक्तिगत कीर्तिमान भन्दा आफ्ना लागि देशको सफलता महत्वपूर्ण रहेको बताए । विश्वकप २०१८ को छनौट अन्तर्गत हिजो राति भएको खेलमा हंगेरीलाई ३–० ले पराजित गराउने क्रममा रोनाल्डोले दुई गोल गरेका थिए । उनले विश्वकप २०१८ को छनौटमा अहिलेसम्म भएका पाँच खेलमा ९ गोल गरिसकेका छन् । पोर्चुगलको टिमबाट ७० गोल गरेका रोनाल्डो युरोपका देशबाट सर्वाधिक गोल गर्ने खेलाडीको सूचिमा चौथो स्थानमा पनि उक्लिएका छन् । तर रोनाल्डोले आफूलाई व्यक्तिगत सफलता नभइ टिमको सफलताले खुशी मिल्ने बताए । टिममा निकै राम्रा युवा खेलाडी रहेकाले जित्न सफल भएको रोनाल्डोको भनाई छ । हंगेरीसँगको खेलमा एक गोल गरेका एन्ड्रे सिल्भाले निकै राम्रो खेलेको रोनाल्डोले बताए ।