निर्वाचन आयोगको कार्यालय घेराउ गर्दै राप्रपा

७ चैत, काठमाडौं – सत्तारुढ राप्रपाले विधानबाट राजसंस्था र हिन्दु राष्ट्रसम्बन्धी वाक्यांश हटाइदिएको विरोधमा  निर्वाचन आयोग घेराउ गर्दैछ ।

राप्रपाको विधान संविधानसँग बाझिएको भन्दै आयोगले यसअघि राजसंस्था र हिन्दु राष्ट्र सम्बन्धी वाक्यांश हटाएर प्रमाणित गर्ने निर्णय गरेको थियो ।त्यसको विरोधमा कान्तिपथस्थित आयोगको केन्द्रीय कार्यालय घेराउ गर्न लागिएको राप्रपाले जनाएको छ ।

राप्रपाका सहप्रवक्ता मोहन श्रेष्ठका अनुसार राप्रपाका नेता-कार्यकर्ताहरु सोमबार मध्यान तिर शान्तिवाटिकामा जम्मा भएर आयोगको कार्यालयसम्म पुगेर प्रदर्शन गर्नेछन् । त्यसपछि आयोग कार्यालय अगाडि एक घण्टा धर्ना दिने कार्यक्रम छ ।

संवैधानिक अधिकारमा स्वतन्त्र बिचार बोक्न पाउनुपर्ने आयोगले कुठाराघात गरेको राप्रपाको आरोप छ । आयोगको निर्णयबाट असन्तुष्ट राप्रपाले निर्णय नसच्चिए सरकारबाट बाहिरिने चेतावनी दिएको छ । हिजो संसद सचिवालयमा संविधान संशोधन प्रस्ताव दर्ता गराएको छ ।